🌴 בצל מורינו 🌴

🌴בצל מורינו🌴
= דינסטאג פרשת בראשית =

אינדערפרי האט זיך הגה"צ אבדק"ק ור"מ שליט"א ארויסגעלאזט אויפן וועג צום בנין הישיבה דקהילת יעקב פאפא בשכונת רעד הוק נעבן וויליאמסבורג וואו עס איז פארגעקומען דעם גרויסארטיגן 'יום הקצירה' יום שכולו תורה פאר די בחורי ישיבתינו הק' וומ"ס חברי חבורת קדושת יו"ט וועלכע איז נתייסד געווארן און ווערט געפירט דורכ'ן רב שליט"א.

ארום 9:45 איז דער רב אריינגעקומען בהיכל הביהמ"ד צו תפילת שחרית ברוב עם,
פארן דאווענען האט דער רב געלייגט תפילין פאר די בר מצוה בחור בן הרה"ג ר' הערשל הורוויץ שליט"א - מנהל ישיבה לצעירים.

נאכן דאווענען האט דער רב משמיע געווען א שיעור תהילים,
דער רב האט ארומגערעדט איבער די השפעה פונעם הייליגן יו"ט סוכות, און מזאל מיטנעמען אלע קבלת טובות אויף ווייטער, בפרט בעניני לימוד התורה און אוודאי מער זיך אריינלייגן צו לערנען די עולם הבא מסכתא וואס די בחורים האבן זיך אונטערגענומען צו לערנען און חזרן, און דאס איז די עבודה פון א בחור נאך יו"ט, זעהן אנצוהאלטן די קבלת טובות,
און דער רב האט ארומגערעדט מיט התרגשות איבער די הייליגע צווייטע טעג סוכות וואס מען האט געהאט די זכי' מיטצוהאלטן בצל הקודש פון אביו הגדול כ"ק מרן רבינו הגה"ק שליט"א.

דער רב האט ממשיך געווען ארומרעדן די מחזק צו זיין אין די שיעורים הלימוד ובפרט אנצוהאלטן די לימודי הישיבה ,
דערביי האט דער רב געמאלדן די בשורה טובה ומרנינה איבער די התמנות פון די צוויי נייע מנהלים פון די ישיבות קטנות סניף נזר התורה און סניף חכמת התורה וואס ווערן אויפגענומען צום נייעם ווינטער זמן צו קענען בעז''ה ארויפברענגען די צוויי סניפי הישיבת אויף א העכערן שטאפל,
ה"ה הרה''ג ר' שמחה רובין שליט''א - ב''פ - מלפנים מנהל ישיבת געלדצהעלער בן הגה''צ ר' חיים יעקב שליט''א - אבד"ק ציעשנוב ור''י ישיבה גדולה ויואל משה דמוסדתינו הק' ב''פ וחתן כ"ק אדמו''ר מבאבוב 45 שליט''א וואס וועט דינען אלס מנהל ישיבה קטנה סניף נזר התורה, און הרה''ג ר' חיים דוד פאנעט שליט''א - ב''פ בן האדמו''ר מקארלסבורג מאנטריאל שליט''א וואס וועט דינען אלס מנהל ישיבה קטנה סניף חכמת התורה,
און דער רב האט אויסגעפירט מיט ברכות לרוב אז די ביידע מנהלים זאלן קענען בעז"ה פירן די ישיבות על מי מנוחות מיט און קענען מרומם זיין כבוד התורה והיראה און אלע הנהגות וועלכע ווערן פארלאנגט אין אונזערע ישיבות און וועט נמשך ווערן ביתר שאת ועוז אין ישיבה לצעירים.

דער רב האט צוגעענדיגט איבערן תכלית פונעם סדר היום אז מען איז ארויסגעקומען דא צו איבערחזרן די אלטע לימודים און זיך דערנאך שטעלן צום פארהער אויף די לימודים, און דער רב האט מסיים געווען מיט ברכות לרוב.

דערנאך איז דער רב אריין בחדרו הפרטי און עס איז פארגעקומען א מסיבת לחיים מיט די בר מצוה בחור,
עס האט זיך פארמירט א שיינעם שמועס איבער די מנהג אז בחורים לייגן תפילין חוה"מ, און דער רב האט אנגעוואונטשן פארן בר מצוה בחור און פארן מנהל הרה"ג ר' הערשל שליט"א, דערביי האט דער רב געוואונטשן הצלחה פארן נייעם זמן און מען זאל קענען אינאיינעם מרומם זיין די ישיבה בדרכי בתורה והיראה.

דערנאך איז דער רב אהיים לביתו, און דערווייל האט הרה"ג ר' אברהם שווארץ שליט"א און האט אויפגעטראטן מיט א דרשה פאר די בחורים און ארומגערעדט איבער די ציהל פונעם טאג און וויאזוי צו לערנען די גמרא עס זאל אריינגיין אינעם קאפ, און אויסגעטראטן דעם וועג וויאזוי צוזאמצונעמען די לימודים קורצן,
דערנאך ארום 12:30 האבן זיך די בחורים געזעצט אויף א סדר הלימוד פון ארום צוויי אהאלב שעה,
דערנאך זענען אנגעקומען די בוחנים הגה"צ ר' מאיר צוויבל שליט"א - מרבני קהילתינו הק', הרה"ג ר' שלמה שבתי' קענסטענבוים שליט"א - מרבני קהילתינו הק', און הרה"ג ר' אברהם שווארץ שליט"א און הרה"ג ר' דוד גרינפעלד שליט"א - מו"ץ בקהילתינו הק' ק"י, און פארהערט די בחורים יעדער באזונדער פאר א לענגערע צייט, און די בחורים האבן טאקע ארויסגעוויזן די קענטעניסן אין די לימודים.

ארום 3:15 איז דער רב צוריקגעקומען צום יום הקצירה,
ביים אנקומען האט זיך דער רב באדאנקט פאר הנהלת ישיבת פאפא פארן צושטעלן די בנין פארן טאג און אזוי שיין אהערשטעלן אלעס עצהיו"ט,
דער רב איז אריין בחדרו הפרטי און די בוחנים שליט"א זענען אריין איבערגעבן א גריס פונעם פארהער ווי אלע בחורים האבן אזוי גוט געקענט.

= ליל הושענה רבה =

דער רב האט געדאווענט תפילת מעריב בזמן רבינו תם אין ביהמ"ד הגדול.

אום 9:45 איז דער רב אריינגעקומען בהיכל בית מדרשינו הגדול צו קריאת משנה תורה,
בעל קורא: הרה"ח ר' יודל ווערצבערגער הי"ו און הרה"ח ר' מענדל מיטטעלמאן הי"ו,
מען האט געענדיגט אום 11:30.

ארום 11:45 איז דער רב אריינגעקומען אינעם סוכה הגדולה שע"י ביהמ"ד הגדול צום סעודת הושענא רבה,
דער רב האט איינגעלאדנט די אושפיזין און זיך געוואשן צום סעודה,
מען האט אויפגעגעבן די מאכלים אזויווי יו"ט,
נאך די פיש האט דער רב געמאכט א לחיים און געוואונטשן 'א גוט קוויטל' פאר'ן גאנצן ציבור,
במשכ'ן סעודה האט מען געזינגען פילע ניגוני התעוררות, ניגוני ימים נוראים, און נאך, און דער רב האט מאריך געווען בבכיות.

מיט די שיר המעלות האט דער רב מכבד געווען:
הרה"ח ר' משה דוד גאלדשטיין הי"ו,
הרה"ח ר' דוד שמעון פראמאוויטש הי"ו,
הרה"ח ר' דוד אהרן וויינשטאק הי"ו.

דערנאך האט דער רב משמיע געווען די פלאם פייערדיגע דרשת הושענא רבה כמנהג אבותינו ורבותינו הקדושים, דברי תורה בדברי התעוררות וכיבושין מיט בכיות נוראות,
דער רב האט אנגעהויבן אז אבותינו ורבותינו פלעגן זאגן דעם דרשת הושענא רבה, אויפדערנאכט, און מיט בכיות, אנגעהויבן פונעם זיידן ז"ל דער הייליגער ישמח משה, און דער רבי ז"ל פלעגט עס זאגן צופרי פאר די הושענות,
דער משל מיט'ן מלך װאס איז געקומען אין שטאט, און ס'איז געווען עטליכע ערליי מענטשן וואס זענען געקומען אין אנדערע צייטן, דער וואס איז אנגעקומען ווען דער מלך געזעגנט זיך שוין פון שטאט, איז א גרויסע בושה, אבער אז ער זאגט אז קומט לכבוד המלכות, קען מען אים נאך אננעמען,
דער רב האט מיט א קול געשטיקט פון טרערן אויסגעטייטשט דעם הושענא למענך אלקינו, לויט ווי דער מהרש''א זאגט אז ווען ס'איז אין שמו שלם ווערט דער אויבערשטער נישט אנגערופן מלך נאר אבינו, זאגט אבער דער ישמח משה אז דאס וואס מיר זאגן ביי יעדע ברכה מלך העולם איז ווייל ס'איז דא נאך א בחינה פון מלוכה, אז דער מלך איז כובש כעסו, ער זאגט נישט אלעס וואס ער האט צו זאגן און ער טוט נישט אלעס וואס ער האט צו טון, מיר ווילן אבער אז ס'זאל שוין זיין וידע כל פעול כי אתה פעלתו וכו' מלכותו בכל משלה, אז ס'זאל זיין שמו שלם וכסאו שלם,
טייטשט דער ישמח משה, והמלך ישמח באלקים, די שמחה אין די מלוכה איז נאר ווען ס'איז בבחינת אלקים, א ריכטיגע ממשלה,
דער ייטב פנים טייטשט הושענא למען רחמיך הרבים לויט ווי דער ישמח משה זאגט יחיד ורבים הלכה כרבים, אז דער אויבערשטער איז דאך א מלך יחיד און כלל ישראל איז א רבים, דארף דער אויבערשטער אויסהערן אידישע וועלט און פאלגן וואס זיי זאגן,
מיט דעם האט דער רב געטייטשט ואני תפילתי וכו' אז מ'זאל שוין זוכה זיין אז די מלכות זאל אנקומען צו מדריגת 'אלקים', מיט די כח וואס אידישע קינדער זענען רוב, ברוב חסדיך, און אזוי אויך איז רבו''ת אנחותי, ס'זאל שוין זיין ענינו באמ''ת ישעיך מיט א ישועה נצחיות.

מיט טרערן האט דער רב ממשיך געווען אז דער אויבערשטער איז א מלך סבלן, ער געבט כוחות פאר א איד אפילו ווען ער איז חלילה חוטא קעגן אים, און מיט דעם האט דער רב געטייטשט כי עמך הסליחה, אז דער אויבערשטער איז מיטן איד בשעת ער זינדיגט און עכ''ז איז ער מוחל דערויף,
דער רב האט געפייערט אז ווען אידן זענען נעבעך און גלות איז עס א בושה פאר מלכות שמים, און מיט דעם אויסגעטייטשט דעם ברוב חסדיך, ווייל רש''י זאגט אז חסד איז א לשון חרפה,
און דער רב האט אויסגעפירט מיט ברכות לרוב אז מ'זאל שוין זוכה זיין צו הערן דעם קול שופר וועלכע וועט אויסשרייען אז דער מלך איז דא צוריק מיט אונז בב''א.

מיט ברכת המזון האט דער רב מכבד געווען הגה"צ ר' ברוך בערגער שליט"א ממישקאלץ,
מען האט געענדיגט ארום 1:05, און דער רב האט זיך ארויסגעלאזט אויפ'ן וועג קיין קרית יואל וואו דער רב וועט וויילן אויף יו"ט שמיני עצרת און שמחת תורה בצל הקודש פון אביו הגדול כ"ק מרן רבינו הגה"ק שליט"א.

א גוט קוויטל.
~🌴~

🌴בצל מורינו🌴
= דאנערשטאג יום ד' דחוה"מ סוכות =

ארום 9:45 אינדערפרי איז הגה"צ אבדק"ק ור"מ שליט"א אריינגעקומען בהיכל ביהמ"ד הגדול צו תפילת שחרית ברוב עם,
צום עמוד איז צוגעגאנגען הרה"ח ר' הערשל שווארטץ הי"ו,
דער רב האט יורד געווען לפני התיבה צו אמירת הלל און פארגעדאווענט מיט גרויס התעוררות, און דער רב האט אפגעראכטן די עבודת הנענועים מיט השתפחות הנפש, ווען דערביי האט דער ציבור געזינגן די ניגונים מבי מדרשא של רבותינו הק' זי''ע כנהוג,
און דערנאך האט דער רב פארגעזאגט די הושענות מיט גרויס דביקת והתעוררות.

ביים ליינען זענען מכובד געווארן:
הוצאה והכנסה: הרה"ח ר' לייבוש גרינפעלד הי"ו,
בעל קורא: הרה"ח ר' משה אפרים הערשקאוויטש הי"ו,
כהן: הרה"ג ר' יושע געלב שליט"א - מו"ץ,
לוי: ר' הערשל גרובער הי"ו,
שלישי: הרה"ח ר' אשר ווידער הי"ו - מאנטריאל,
רביעי: הגה"צ אבדק"ק ור"מ שליט"א,
הגבה: הרה"ח ר' נפתלי הירצקא פריעדמאן הי"ו,
גלילה: הרה"ח ר' אברהם יעקב פריעדמאן הי"ו
צו תפילת מוסף איז צוגעגאנגען הר"ר יואל טויב שליט"א,
נאכן דאווענען איז דער ציבור אריבער זאגן א גוטן מועד, מען האט געענדיגט ארום 12:20.

פארנאכטס האט דער רב געדאווענט תפילת מנחה אין ביהמ"ד הגדול.

דער רב האט משמיע געווען די צווייטע מאל דברי תורה,
דער רב האט ארומגערעדט איבער דאס וואס רבותינו הקדושים האבן זוכה געווען צו זעהן די פריערדיגע אבות אראפקומען צו די הקפות, דער הייליגער עצי חיים זי"ע איז מסביר אז דאס איז אלס ענין פון גדול העומד על גביו,
דער רב האט אבער פארציילט די מעשה וואס רבינו שליט''א דערמאנט אלס איבער דעם אז מ'דארף זיין ראוי צו האבן די זכיה דערצו,
ביי שמחת בית השואבה האט מען זיכער זוכה געווען צו די התגלות פון די אבות הקדושים, פארדעם האט מען געדארפט מתקן זיין די תיקון גדו''ל פאר די נשים ווייל אויב נישט וואלט מען חלילה נישט זוכה געווען דערצו,
דער רב האט ארומגערעדט איבער די געוואלדיגע קדושה וואס חסידים ואנשי מעשה האבן געשפירט צו די קדושת הסוכה, עד כדי כך אז דער וויענער רב הגה''צ ר' עזריאל יודא כ''ץ זצ''ל האט מקפיד געווען אז ס'זאל זיך נישט געפינען קיין ענגלישע בוכשטאבן אינעם סוכה, און יעדער איז זיכער מקפיד אז ס'זאל זיין ביותרת הכבוד נישט אריינצוברענגען נישט אויסגעהאלטענע מכשירים וכדומה,
אבער דער רבי ז''ל פלעגט זאגן אז ס'דארף זיין תדורו כעין תשבו, ווייל אין היקש למחצה, ממילא דארף מען ארויסגיין סוכות מיט א לימוד אויף א גאנץ יאר וויאזוי זיך אויפצופירן,
מיט דעם האט דער רב אויסגעטייטשט 'אם אני אבא אל ביתי' אויב קען איך אריינקומען אינעם אויבערשטנס הויז, דאס הייסט אז איך האב אן אויסגעהאלטענע שטוב און איך פיר מיר אויף ווי ס'דארף צו זיין, דעמאלטס 'אתה אבא אל ביתך' קען דער אויבערשטער אריינקומען צו מיר אין שטוב.

דער רב האט ממשיך געווען זאגנדיג, דער סידורו של שבת זאגט אז ווען א איד איז מלוכלך בעוונות קען ער נישט שפירן קיין טעם אין קדושה, אבער אז מ'איז מוחל די עוונות ווערט מען ריין, סוכות איז אן ענין פון ''דעת'', למען ידעו, וואס דאס רייניגט פון די עבירות, כאילו הרחקתי נדוד,
למען ידעו דורותיכם, אזויווי שבת וועלכע איז משפיע דעת, לדעת כי אני ה' מקדישכם, כי בסוכות הושבת''י, מלשון שבת, ווייל נאך סוכות באקומט יעדע איד א נייע טעם אינעם שבת,
פארדעם הייסט עס "שבת בראשית", ווייל ס'איז די ערשטע מאל וואס מ'שפירט אזא טעם אין שבת.

באזונדער האט דער רב ארומגערעדט איבער די גרויסקייט פון הכנה למצוה, אז פון סוכות אינדערפרי האט מען זיך שוין געגרייט בשמחה רבה צו די מצוה פון אכילת מצה, פארדעם שטייט אשה היתה בוררות חטה וכו',
מיר האבן די זכיה צו האלטן די ד' מינים אין די האנט, ונתנו ה' אלקיך בידיך, דער אויבערשטער לייגט זיך אריין אין דיינע היינט, געלויבט דעם אויבערשטן אויף דעם!
דערנאך האט דער רב ארומגערעדט איבער די גרויסקייט פון הושענא רבה, א טאג וואס רבותינו הקדושים האבן אריינגעלייגט אן אויסטערלישע עבודה און מסיים געווען בברכות לרוב אז מ'זאל קענען מיטנעמען די השפעות קדושות אויף ווייטער.

דער רב האט ממשיך געווען און שארף ארומגערעדט איבער די ווייטאגליכע פירצה מיט דעם אז ס'איז אריינגעברענגט געווארן שלא ברשות הנהלת קהילתינו בבית מדרשינו הגדול ווידיאו מאשינען דעם חול המועד,
דער רב האט געזאגט אז טראץ וואס די קהילה האט שוין ארויסגעשטעלט א מודעה מוחה צו זיין דערויף שפירט ער אז אלס רב קען ער נישט בלייבן שטיל און ער מוז אויפפאדערן דערוועגן,
דער רב האט אויסגעפירט אז כדי אוועקצושטעלן די זאך אז מ'זאל חלילה נישט אנקומען נאכאמאל צו אזא מצב וועט מען אוועקשטעלן א תקנה קבועה בבתי מדרשינו אז ס'זאל נישט פארקומען קיין מעמדים וועלכע איז מיוחד בלויז פאר שירה וזמרה, אויב וויל מען אז ס'זאל זיין נגינה וזמר דארף עס זיין אויף אן אופן פון א סעודה ומסיבה של מצוה, צו א שמחה של מצוה צו א שמחת חתן כלה, אבער בלויז נגינה וזמרה זאל מער נישט פארקומען ביי אונז אין די קהילה,
און דער רב האט מסיים געווען מיט ברכות לרוב פארן גאנצן ציבור.

מען האט ממשיך געווען מיט עטליכע ניגוני שמחה, און דער רב האט זיך אויפגעשטעלט טאנצן,
מיטן בענטשן האט דער רב מכבד געווען הגה"צ ר' משה דוד הורוויץ שליט"א - רב דביהמ"ד ברך משה דקהילתינו הק' ב"פ ,
מען האט געענדיגט ארום 12:15 און דער רב איז אהיים לביתו.

א גוטן מועד.
~🌴~