🌴 בצל מורינו 🌴

🌴בצל מורינו🌴
= דאנערשטאג פרשת וישלח =

ארום 7:10 אינדערפרי האט הגה"צ אבדק"ק ור"מ שליט"א פארגעלערנט דעם טעגליכן שיעור בחבורת יסודי התורה אין חדר א' בבית מדרשינו הגדול,
דער רב האט פארגעלערנט מסכת גיטין דף ע"א ע"ב - ע"ב ע"א,
מ'האט געענדיגט ארום 7:50.

אין די פארמיטאג שעה'ן האט זיך דער רב ארויסגעלאזט אויפ'ן וועג קיין קרית יואל.

ארום 1:30 איז דער רב אנגעקומען אינעם בית האופה דקהילתינו הק' אין קרית יואל, זיך אומקוקן אויף עטליכע נייע מהלכים און הידורים וואס מהאט נארוואס איינגעפירט אינעם בעקעריי, כדי עס צו קענען איינשטעלן אינעם בית האופה דקהלתינו הק' בוומ"ס,
דער רב האט זיך אומגעקוקט אויפ'ן גאנצן סדר האפי' אין באגלייטונג פונעם מנהל בית האופה מוה"ר יואל שלמה זאלדאן הי"ו, און שטארק מפליא געווען די פולע חומרות והידורים, און אנגעוואונטשן ס'זאל זיין מיט הצלחה.

שפעטער האט זיך דער רב ארויסגעלאזט אויפ'ן וועג צו ישיבה קטנה סניף דרך התורה בהנהלת הרה"ג יואל אפפענהיים שליט"א וואס געפונט זיך אין די ליבערטי געגנט,
דער רב איז אנגעקומען ארום 3:15 און אריין בחדרו הפרטי.

דערנאך איז דער רב אריינגעקומען בהיכל הביהמד צו תפילת מנחה,
נאך מנחה איז פארגעקומען דעם וועכנטליכן שבת אחים,
מ'האט געזינגען ניגוני שבת און נאך,
דערנאך האט דער רב מכבד געווען עטליכע בחורים צו זאגן א דבר תורה, צווישן אנדערע נכדו הב' זלמן לייב גלאנץ ני"ו.

דערנאך האט דער רב משמיע געווען דברי תורה,
דער רב האט זיך געשטעלט אויפ'ן פסוק 'עם לבן גרתי ואחר עד עתה' וואס רש"י זאגט 'עם לבן גרתי ותרי"ג מצות שמרתי', און ארומגערעדט בדברי מוסר והדרכה וואס מ'קען ארויסנעמען פון די פסוקים.

באזונדער האט דער רב א לענגערע צייט ארומגערעדט בדברי הכנה ליו"ט חנוכה,
דער רב האט נאכגעזאגט רמזים פון ספרים הקדושים אויף די פך שמן וואס דער כהן גדול האט געטראפן, און געזאגט אז חנוכה איז שוין מרומז פארגאנגענע וואך אין די סדרה,
דער רב האט ארומגערעדט וויאזוי מ'דארף זיך צוגרייטן צו אזא יום טוב, און צוגעענדיגט מיט ברכות לרוב, אז מ'זאל זיך טאקע קענען צוגרייטן מיט א ריכטיגע הכנה צו קענען מקבל זיין די גרויסע אורות פונעם יום טוב.

דערנאך זענען אלע תלמידי הישיבה אריבער זאגן גוט שבת,
דער רב האט פארלאזט דעם בנין הישיבה ארום 4:10.

ארום 4:55 איז דער רב אנגעקומען אין ישיבה קטנה סניף בשבילי התורה בהנהלת הר"ר יואל ניימאן שליט"א וואס געפונט זיך אין די בלומענבורג געגנט,
דער רב איז אריין בהיכל הביהמ"ד וואו עס איז פארגעקומען דעם וועכנטליכן שבת אחים פאר די תלמידי הישיבה,
דער רב האט מכבד געווען עטליכע בחורים צו זאגן א דבר תורה,
מ'האט געזינגען עטליכע ניגונים,
דערנאך האט דער רב משמיע געווען דברי תורה אויף די וואכעדיגע סדרה בדברי חיזוק והדרכה,
דער רב האט א לענגערע צייט ארומגערעדט בדברי הכנה ליום טוב חנוכה וויאזוי זיך צוצוגרייטן צו אזא גרויסן יום טוב,
און דער רב האט צוגעענדיגט מיט ברכות לרוב.

די תלמידי הישיבה זענען אריבער זאגן גוט שבת,
דער רב האט פארלאזט דעם בנין הישיבה ארום 5:30.

אויפדערנאכט האט זיך דער רב באטייליגט ביי די שמחות פון אנשי שלומינו אין קרית יואל.

ארום 10:30 האט זיך דער רב באטייליגט ביים שמחת התנאים פון החתן בן הרה"ח ר' יעקב מרדכי טייטלבוים הי"ו עב"ג הכלה בת הרה"ח ר' חיים לייב מארקאוויטש הי"ו, און אזוי אויך ביים תנאים פון החתן בן הרה"ח ר' משולם שמעי' פריעדמאן הי"ו עב"ג הכלה בת הרה"ח ר' ליפא בר"יי ראזענפעלד הי"ו אין די זאלן שע"י ביתו נאוה קודש פון כ"ק מרן רבינו הגה"ק שליט"א.

דערנאך האט זיך דער רב באטייליגט ביים שמחת החתונה פון המשב"ק החתן חנני' יו"ט ליפא דייטש הי"ו בן הרה"ח ר' ישראל יעקב הי"ו עב"ג בת הרה"ח ר' זלמן לייב פאלקאוויטש הי"ו אין די זאל פון כינור דוד,
דער רב האט געמאכט א לחיים און אנגעוואונטשן פארן חתן, מחותנים און זיידעס, און זיך דערנאך ארויסגעלאזט אין א ריקוד מיט'ן חתן, מחותנים און זיידעס.

דערנאך האט זיך דער רב באטייליגט ביים שמחת החתונה פון החתן בן הרה"ח ר' יצחק אייזיק פאוועל הי"ו - מאנסי, עב"ג הכלה בת הרה"ח ר' שמואל יודא שטיין הי"ו אין די זאל פון בית רחל פאראדייס,
דער רב האט געמאכט א לחיים און אנגעוואונטשן פארן חתן, מחותנים און זיידעס, דערנאך האט זיך דער רב ארויסגעלאזט אין א ריקוד מיט'ן חתן, מחותנים און זיידעס.

ארום 11:10 האט דער רב געדאווענט תפילת מעריב אין חדר דוד ארי' בבית מדרשינו הגדול,
דערנאך איז דער רב אהיים לביתו.

א גוטע נאכט.
~🌴~