🌴 בצל מורינו 🌴

🌴בצל מורינו🌴
= דאנערשטאג פרשת שופטים =

ארום 7:10 אינדערפרי האט הגה"צ אבדק"ק ור"מ שליט"א פארגעלערנט דעם טעגליכן שיעור בחבורת יסודי התורה, אין חדר א' בבית מדרשינו הגדול אין וויליאמסבורג,
דער רב האט פארגעלערנט מסכת גיטין דף מ"ד ע"א,
מ'האט געענדיגט ארום 7:50.

אום 8:00 איז דער רב אנגעקומען אין ישיבה לצעירים,
דער רב איז אריין בחדרו הפרטי וואו דער רב האט געלייגט טלית ותפילין.

ארום 8:50 איז דער רב אריינגעקומען בהיכל הביהמ"ד צו תפילת שחרית,
ביים ליינען האט דער רב עולה געווען שלישי,
נאכ'ן דאווענען האט דער רב געבלאזן שופר און געזאגט צען קאפיטלעך תהילים כנהוג אום חודש אלול.

דערנאך איז דער רב איז אריין בחדרו הפרטי און געלייגט רבינו תם'ס תפילין,
דער רב האט פארלאזט דעם בנין הישיבה אום 10:10.

ארום 10:20 איז דער רב אנגעקומען אין בית המדרש ברך משה דקהילתינו הק' וואו עס איז פארגעקומען די שמחת הברית מילה לבן הנולד אצל מוה"ר ברוך יודא שפיטצער הי"ו - מנהל בית האופה דקהילתינו הק',
דער רב איז געווען סנדק, און געזאגט די ברכות וקריאת השם,
נאכ'ן ברית האט דער רב ווארעם אנגעוואונטשן פאר'ן בעל שמחה און פאר די זיידעס.

אין די נאכמיטאג שעה'ן האט זיך דער רב ארויסגעלאזט אויפ'ן וועג קיין קרית יואל.

ארום 5:50 נאכמיטאג איז דער רב אנגעקומען אין ישיבת דרך התורה סניף ב' בהנהלת הר"ר יואל ניימאן שליט"א וואס געפונט זיך אינעם טשעסטער געגנט אין קרית יואל.

ביים אנקומען האט דער רב געדאווענט תפילת מנחה בהיכל הביהמ"ד אינאיינעם מיט די תלמידי הישיבה.

דערנאך איז פארגעקומען די שמחת הברית מילה לבן הנולד אצל מוה"ר ר' ישראל ב"ר מיכאל איצקאוויטש הי"ו - ק"י, וואו דער רב איז געווען סנדק, און געזאגט די ברכות וקריאת השם.

דערנאך איז פארגעקומען א מסיבת לחיים בהיכל הביהמ"ד,
דער רב האט געמאכט א לחיים און ווארעם אנגעוואונטשן פאר'ן בעל שמחה און פאר די זיידעס, און דערנאך פאר די רמ"י הישיבה און פאר אלע תלמידים.

דער רב האט משמיע געװען א דרשה פאר די תלמידי הישיבה, דער רב האט אויסגעטייטשט די פסוקי תהלים קאפיטל כ"ז וואס מ'פירט זיך צו זאגן נאכ'ן דאווענען אום חודש אלול,
צווישן אנדערע האט דער רב ארויסגעברענגט אז דער יצר הרע איז א שונא וואס מאכט זיך פאר א חבר, און געטייטשט, ממי אירא, פון וועם דארף מען מורא האבן, בקרוב עלי מרעים, פונעם יצר הרע וואס מאכט זיך פאר א חבר, לאכול את בשרי, אבער באמת עסט ער מיר אויף.

דערנאך האט דער רב ארומגערעדט איבער די גרויסקייט פון אויפשטיין פארטאגס, און געטייטשט, אם תקום, אויב מ'שטייט אויף פארטאגס, עלי מלחמה, קען מען פירן א מלחמה מיט'ן יצר הרע, בזאת אני בוטח, און מ'איז פארזיכערט אז מ'וועט באזיגן,
דער רב האט צוגעענדיגט מיט ברכות לרוב,
ארום 7:00 האט דער רב פארלאזט דעם בנין הישיבה אויפ'ן וועג לביתו אין קרית יואל.

ארום 9:00 האט זיך דער רב ארויסגעלאזט אויפ'ן וועג קיין וויליאמסבורג.

אין ווילאמסבורג האט זיך דער רב באטייליגט ביי די שמחות פון אנשי שלומינו,
און דערנאך אום 11:00 געדאווענט תפילת מעריב בבית מדרשינו הגדול.

א גוטע נאכט.
~🌴~