🌴 בצל מורינו 🌴

🌴בצל מורינו🌴
= שבת קודש פרשת ראה =

ערש"ק ארום 5:50 איז הגה"צ אבדק"ק ור"מ שליט"א אריינגעקומען בהיכל הביהמ"ד אין מחנה ישיבה לצעירים וואו עס איז פארגעקומען א סדר הלימוד פאר די תלמידי הישיבה,
דער רב משמיע געווען א דרשה איבער די גרויסקייט פון זיך אנגרייטן צו א שבת מיט לימוד התורה, און דעם עונג שבת וואס מען האט נאכדעם,
דערנאך האט דער רב עוסק געווען בלימודו פאר א לענגערע צייט,
און ארום 7:10 האט דער רב אפגעברענט די ליכט לכבוד שבת קודש כנהוג.

ארום 8:20 איז דער רב אריינגעקומען בהיכל הביהמ"ד און יורד געווען לפני התיבה צו תפילת מנחה,
דערנאך האט מען געדאווענט קבלת שבת ומעריב,
מזמור לדוד הבו לה' האט דער רב פארגעזאגט פסוק בפסוק כמנהג סיגוט,
נאכ'ן דאווענען איז מען אריבער זאגן גוט שבת,
מ'האט געענדיגט ארום 9:30, און דער רב איז אהיים לביתו אינעם מחנה.

= סעודת ליל שבת קודש =

ארום 9:50 איז דער רב אריינגעקומען בהיכל הביהמ"ד צום סעודת ליל שבת קודש,
דער רב האט אנגעהויבן די זמירות און דערנאך קידוש געמאכט און מוציא געווען אלע בחורים.

דער רב האט זיך געוואשן און מ'האט אויפגעגעבן די פיש,
נאך די פיש האט דער רב געמאכט א לחיים און געוואונטשן פאר'ן גאנצן ציבור,
מען האט געזינגען כל מקדש און מנוחה ושמחה און נאך ניגוני שבת,
דערנאך האט דער רב משמיע געווען דברי תורה אויפ'ן פסוק 'ראה אנכי נותן לפניכם היום ברכה' און עס אויסגעטייטשט אויף עטליכע מהלכים בדרך דרוש ופלפול.

מען האט אויפגעגעבן די זופ און פלייש, און די איבריגע מאכלי הסעודה, און מען האט ממשיך געווען מיט עטליכע ניגונים,
דערנאך האט מען געבענטשט,
נאכ'ן בענטשן האט מען אויפגעגעבן פירות,
דערנאך האט דער רב דערציילט עובדות וסיפורים פון זקינו הרה"ק ר' יואל אשכנזי זי"ע - אבדק"ק זלאטשוב,
מ'האט געענדיגט ארום 12:45, און דער רב איז אהיים לביתו.

= וביום השבת קודש =

ארום 9:00 אינדערפרי איז דער רב אריינגעקומען בהיכל הביהמ"ד וואו דער רב האט זיך אומגעקוקט אויף דעם וועכנטליכן סדר הלימוד מיט גרויס קורת רוח,
דערנאך האט דער רב געלערנט מיט א חברותא מתלמידי הישיבה פאר א לענגערע צייט, און ארום 10:00 איז דער רב אהיים לביתו.

ארום 10:40 איז דער רב אריינגעקומען בהיכל הביהמ"ד צו תפילת שחרית,
ביים ליינען האט דער רב עולה געווען שישי,
נאך תפילת מוסף איז דער ציבור אריבער זאגן גוט שבת,
מ'האט געענדיגט ארום 1:00, און דער רב איז אהיים לביתו.

= סעודת יום שבת קודש =

ארום 1:30 איז דער רב אריינגעקומען בהיכל הביהמ"ד צום סעודת יום שבת קודש,
דער רב האט געמאכט קידוש, און דערנאך זיך געוואשן, און מ'האט אויפגעגעבן די פיש,
נאך די פיש האט דער רב געמאכט א לחיים און געוואונטשן פאר'ן גאנצן ציבור.
מען האט געזינגען ניגוני שבת,
און מען האט אויפגעגעבן די אייער און די טשולענט און די ווייטערדיגע מאכלי הסעודה.

דערנאך האבן די בחורים געהאט דעם געלעגנהייט אנצופרעגן שאלות בכל תחומי החיים בעבודת השם, און עס האט זיך פארצויגן 'שאלות ותשובות' פאר א לענגערע צייט,
דער רב האט במתק לשונו געענטפערט דבר דבור על אופניו בטוב טעם ודעת ברענגענדיג א בהירות און א קלארקייט אין פילצאליגע נושאים בעבודת השם,
במשכ'ן שמועס איז אויסגעשמועסט געווארן שאלות בעניני מסורה, לימוד התורה, התקשרות לצדיקים, קדושת וזמן שבת, טבילה במקוה, היינטיגע חסידים, דער רבי ז"ל בליק אויף יעדע זאך, מצות צדקה, קדושת העינים, דרך העבודה פאר א בחור, די מעלות פון א גרויסער קהילה, און נאך פיל.

דערנאך האט מען געבענטשט,
מען האט געענדיגט ארום 4:00 און דער רב איז אהיים לביתו.