🌴 בצל מורינו 🌴

🌴בצל מורינו🌴
= שבת קודש פרשת דברים - שבת חזון =

דעם שבת קודש האט הגה"צ אבדק"ק ור"מ שליט"א געפראוועט א שבת התאחדות אינאיינעם מיט די תלמידי ישיבה גדולה ומתיבתא סניף דברי יואל בהנהלת הרה"ג ר' דוד שלמה עקשטיין שליט"א אין מחנה ישיבה לצעירים אין ליבערטי.

ערש"ק ארום 7:45 נאכמיטאג איז דער רב אריינגעקומען בהיכל הביהמ"ד אינעם מחנה וואו דער רב האט אפגעברענט די ליכט לכבוד שבת קודש כנהוג.

ארום 8:35 איז דער רב אריינגעקומען בהיכל הביהמ"ד און יורד געווען לפני התיבה צו תפילת מנחה,
נאך מנחה האט דער רב משמיע געווען קורצע דיבורים און ארומגערעדט איבער דעם גרויסן שבת 'שבת חזון' אין וואס מ'טרעט יעצט אריין, דער רב האט נאכגעזאגט די תפארת שלמה אויפ'ן פסוק 'רב לך שבת בהר הזה', 'רב לך שבת בעמק הבכא', אז דאס ווייזט אויף שבת קודש, און אזויווי דער בני יששכר זאגט אז ווי שוואכער די וואכנטעג זענען אלץ גרעסער איז דער שבת, און דערפאר איז שבת חזון פון די גרעסטע שבתים פון יאר, און דער רב האט אויסגעפירט אז דורך דעם שבת קומט מען צו צו ביאת המשיח, און מיר האפן טאקע אי"ה ארויסגיין פונעם שבת און אריינגיין אין א יום טוב.

דערנאך האט מען געדאווענט קבלת שבת ומעריב,
מזמור לדוד הבו לה' האט דער רב פארגעזאגט פסוק בפסוק כמנהג סיגוט,
נאכ'ן דאווענען איז דער גאנצער ציבור אריבער זאגן גוט שבת און שלום נעמען,
מ'האט געענדיגט ארום 10:20, און דער רב איז אהיים לביתו אינעם מחנה.

= סעודת ליל שבת קודש =

ארום 10:45 איז דער רב אריינגעקומען בהיכל הביהמ"ד צום סעודת ליל שבת קודש,
דער רב האט אנגעהויבן די זמירות און דערנאך קידוש געמאכט און מוציא געווען אלע בחורים,
מיט הגבהת הכוס איז מכובד געווארן הב' ישכר בער טייטלבוים ני"ו בן הגה"צ ר' ברוך טייטלבוים שליט"א - רב דביהמ"ד ברך משה ק"י.

דער רב האט זיך געוואשן און מ'האט אויפגעגעבן די פיש,
נאך די פיש האט דער רב געמאכט א לחיים און געוואונטשן פאר'ן גאנצן ציבור,
מען האט געזינגען פילע ניגוני שבת קודש און ניגוני גלות וגאולה.

דערנאך האט דער רב משמיע געווען דברי תורה אויפ'ן פסוק 'ה' אלקיכם הרבה אתכם והנכם היום ככוכבי השמים לרוב' וואס דער מדרש זאגט 'זה שאמר הכתוב ואני ברוב חסדך אבוא ביתך אשתחוה אל היכל קדשך ביראתך', און ארויסגעברענגט אז יום טוב זאגט מען 'ואין אנחנו יכולים לעלות וליראות ולהשתחוות לפניך', אפי' בוקן קען מען זיך באמת יא אויך היינטיגע צייטן אבער ס'איז נישט מיט דעם פנימיות אזויווי אין ביהמ"ק, און אויף דעם דארפן מיר האפן אז מ'זאל צוקומען צו דינען דעם אויבערשטן מיט אן אמת און מיט פנימיות.

מען האט געזינגען כל מקדש און מנוחה ושמחה און נאך ניגוני שבת,
דערנאך האט דער רב משמיע געווען דברי תורה אויפ'ן פסוק 'ויהי בארבעים שנה בעשתי עשר חודש באחד לחודש דבר משה אל בני ישראל ככל אשר צוה אותו אליהם' און עס אויסגעטייטשט אויף צוויי מהלכים בדרך דרוש ופלפול.

מען האט אויפגעגעבן די זופ און פלייש, און די איבריגע מאכלי הסעודה, און מען האט ממשיך געווען מיט עטליכע ניגונים,
מיט ברכת המזון האט דער רב מכבד געווען הר"ר יואל גרובער שליט"א - ר"מ בישיבה,
נאכ'ן בענטשן האט מען אויפגעגעבן פירות, דער רב האט טועם געווען און פארטיילט פאר די פרישע חתנים,
דערנאך האט דער רב דערציילט עובדות וסיפורים פון הרה"ק החוזה מ'לובלין זי"ע וואס די יארצייט געפאלט דעם קומענדיגן זונטאג - תשעה באב,
מ'האט געענדיגט ארום 1:55, און דער רב איז אהיים לביתו.