🌴 בצל מורינו 🌴

= שיעור פרקי אבות =

ארום 7:30 איז דער רב אריינגעקומען בהיכל בית המדרש אנשי חי"ל פראנקפורט צו פרקי אבות,
דער רב האט זיך געשטעלט אויפ'ן מימרא 'כל ישראל יש להם חלק לעולם הבא וכו' נצר מטעי מעשה ידי להתפאר', און אויף די ערשטע צוויי משנה'ס אין פרק ג' אין מסכת אבות, און עס אויסגעטייטשט אויף עטליכע אופנים און מהלכים במשך דעם דרשה,
דער רב האט משמיע געווען דברי מוסר והחתזקות איבער פילע ענינים, צווישן אנדערע איבער דעם ענין פון קביעת עתים לתורה וואו דער רב האט ארויסגעברענגט אז א יעדער איד דארף האבן א קביעות'דיגן שיעור וואו ער לערנט, אבער נישט נאר זיין איינגעשריבן אינעם שיעור און נישט אנקומען דערצו, ווייל אויב יא זאגט דער אויבערשטער איך וועל דיר אויך איינשרייבן אינעם ספר חיים און אינעם ספר פרנסה וכלכלה וכדומה אבער דו וועסט עס נישט באקומען,
דער רב האט גערעדט איבער קדושת שבת, וויאזוי מען דארף זיך אויפפירן אום שבת און אלעס ארום, און ארויסגעברענגט אז א שבת'דיגע סעודה דארף צוגיין מיט אן ערנסטקייט און עס פאסט נישט און באלאנגט נישט צו רעדן אמעריקאנע פאליטיק ביים שבת טיש, כל שכן וכל שכן נישט קיין ארץ ישראל'דיגע פאליטיק וואס שלעפט אריין אין דברי מינות ואפיקורסות,
דער רב האט ארויסגעברענגט די גרויסע זכיה וואס מיר האבן אז מיר זענען אידישע קינדער, בני מלכים, און דערצו זענען מיר נאך היימישע אידן, חסיד'ישע אידן, והעולה על כולנה זענען מיר סאטמאר'ע אידן, דער רב האט ארומגערעדט וואס דאס מיינט און וואס דאס איז מחייב פאר אונז, און צוגעענדיגט מיט ברכות לרוב.

= רעוא דרעוין =

ארום 8:35 נאכמיטאג האט מען געדאווענט תפילת מנחה,
צום עמוד איז צוגעגאנגען מוה"ר שמואל געלבמאן הי"ו - גבאי הביהמ"ד,
הוצאה והכנסה: הרה"ג ר' יוסף חיים קויפמאן שליט"א - רב הביהמ"ד,
בעל קורא: מוה"ר שלמה זלקא מויזקאפף הי"ו,
לוי: הרה"ח ר' יוחנן מאנן הי"ו,
שלישי: מוה"ר שמואל געלבמאן הי"ו,
הגבה: הגה"צ אבדק"ק ור"מ שליט"א.

נאך תפילת מנחה האט זיך דער רב געוואשן צו שלש סעודות,
נאך די פיש האט דער רב געמאכט א לחיים און געוואונטשן פאר'ן גאנצן ציבור,
דערנאך האט דער רב אנגעהויבן די זמירות של"ס,
מיט אודה האט דער רב מכבד געווען מוה"ר שמעי' רייך הי"ו,
שיר המעלות: מוה"ר יואל מרדכי אינדיג הי"ו.

נאכ'ן זמן מוצאי שבת קודש האט מען אויסגעלאשן די לעקטער'ס אינעם היכל הביהמ"ד, און מ'האט ממשיך געווען מיט ווארעמע ניגוני התעוררות ועוד,
דער רב האט געזאגט שלש סעודות תורה, און זיך געשטעלט אויפ'ן פסוק 'אלה הדברים אשר יעשה אותם האדם וחי בהם', און עס אויסגעטיישט במתק לשונו,
דער רב האט צווישן אנדערע ארויסגעברענגט אז מען דארף בעטן דעם אויבערשטן אז ער זאל מתפלל זיין פאר אונז, מיר האבן שוין נישט די כוחות דערצו, און אזוי אויך דארף מען וויסן אז דער אויבערשטער פארלאנגט שוין נישט היינטיגע צייטן פון אונז דאס וואס ער האט אמאל געדארפט פון די דורות הקודמים, און צוגעלייגט אז מ'דארף זיך מחזק זיין בדברים הצריכין חיזוק, און דער רב האט צוגעענדיגט מיט ברכות לרוב.

ידיד נפש: מוה"ר משה יצחק איצקאוויטש הי"ו,
קל מסתתר: מוה"ר ישכר בעריש מויזקאפף הי"ו,
דער רב האט געבענטש על הכוס,
הגבהת הכוס: הרה"ג ר' יוסף חיים קויפמאן שליט"א.

דערנאך האט מען געדאווענט תפילת מעריב, צום עמוד איז צוגעגאנגען מוה"ר שמעי' רייך הי"ו,
נאך מעריב האט דער רב געציילט ספירה פאר'ן עמוד בהתלהבות אש קודש,
דער רב האט געמאכט הבדלה פאר'ן גאנצן ציבור און מוציא געווען אלע בחורים,
דערנאך האט מען געזינגען בשעת דער רב זאגט המבדיל און ויתן לך,
דערנאך איז דער רב גאנצער ציבור אריבער זאגן א גוטע וואך און זיך געזעגענען,
מ'האט געענדיגט ארום 11:00 און דער רב האט פארלאזט דעם בנין הביהמ"ד אויפ'ן וועג אהיים לבית האכסניא אין באגלייטונג פון פילע אנשי שלומינו און בחורי חמד.

מוצאי שבת קודש איז דער רב ארויף לבית הרבני הנגיד ר' יואל קרויס הי"ו וואו דער נדבן האט בייגעשטייערט א שיינע סכום לטובת דעם נייעם בנין הישיבה,
עס האט זיך פארמירט א שיינע שמועס און דער רב האט ווארעם אנגעוואונטשן ברכות לרוב,
דערנאך איז דער רב אהיים לביתו אין קרית יואל.

א גוטע נאכט.
~🌴~