🌴 בצל מורינו 🌴

🌴בצל מורינו🌴
= ליל שבת קודש - שביעי של פסח =

ארום 8:10 איז הגה"צ אבדק"ק ור"מ שליט"א אריינגעקומען בהיכל בית מדרשינו הגדול וואו דער רב האט יורד געווען לפני התיבה צו תפילת מנחה,
בעל תפילה קבלת שבת ומעריב: הר"ר אלעזר מענדל פילעפף שליט"א - ר"מ בישיבה קטנה סניף מבצר התורה,
מען האט געזינגען ביי 'המעביר בניו' כנהוג,
נאך תפילת מעריב האט דער רב געציילט ספירה פאר'ן עמוד בהתלהבות אש קודש,
נאכ'ן דאווענען איז דער ציבור אריבער וואונטשן א גוט שבת און א גוט יום טוב,
מען האט געענדיגט ארום 9:30, און דער רב האט פארלאזט דעם בנין הביהמ"ד אויפ'ן וועג אהיים לביתו.

= מעמד שירת הים - התוועדות ליל שבת קודש =

ארום 12:05 איז דער רב אריינגעקומען בהיכל הביהמ"ד צום מעמד שירת הים אינאיינעם מיט'ן וועכנטליכן התוועדות ליל שבת קודש בהשתתפות אלפי אנשי שלומינו מכל רחבי העיר ובראשם רבני ודייני קהילתינו הק',
דער היכל הביהמ"ד איז געווען אויסגעשטעלט אויף גאר א גרויסן פארנעם צו קענען אקאמאדירן דעם ריזן ציבור וואס זענען געקומען מיטהאלטן די דערהויבענע שירה בראשות דעם רב שליט"א.

מען האט געזינגען ניגוני יו"ט פאר א לענגערע צייט,
דער רב האט טועם געווען פירות און דערנאך געמאכט א לחיים און געוואונטשן פאר'ן גאנצן ציבור,
מיט כל מקדש האט דער רב מכבד געווען הרה"ח ר' חיים אליעזר גראס הי"ו - מראה"ק,
מנוחה ושמחה האט דער רב אליינס אנגעהויבן,
קה אכסוף: הרה"ח ר' מנחם גרשון לעבאוויטש הי"ו,
ויהיו רחמיך: הר"ר יחיאל מיכל ניימאן שליט"א - ר"מ בישיבה קטנה סניף היכל התורה.

דערנאך האט דער רב משמיע געווען דברי תורה אויף די פסוקים 'מה לך הים כי תנוס וגו', מלפני אדון חולי ארץ מלפני אלוק יעקב, ההופכי הצור אגם מים חלמיש למעינו מים', און אויסגעטייטשט אויף כמה אופנים, און צווישן אנדערע געזאגט עטליכע מהלכים אין די טעם פונעם נס קריעת ים סוף, און אויפגעבויעט אויף איין מהלך אז ס'האט א שייכות מיט דעם וואס יעקב אבינו האט שוין אמאל געשפאלטן די וואסער טייטשנדיג מיט דעם פילע פסוקים און מדרשים.

דער רב האט ארויסגעברענגט דעם גרויסן זמן אין וואס מ'שטייט, און וואס מ'קען אלץ אויס'פועל'ן אין דעם טאג, דער רב האט נאכגעזאגט פון צדיקים אז שביעי של פסח איז א צייט וואס מען קען איבערדרייען פון די ווארט צרה צו צהר וכדו', און מען קען זיך גוט אויסבעטן,
און באזונדער ארומגערעדט איבער די גרויסע סגולה אויף פרנסה ביום שביעי של פסח, און צווישן אנדערע ארויסגעברענגט אז דאס יאר וואס מ'שטייט אום שבת קודש איז דאך אסאך מער מסוגל דערפאר ווייל כל ברכאן דלעילא ותתא ביומא שביעאה תליין, און צוגעענדיגט מיט ברכות לרוב.

דערנאך האט מען ממשיך געווען מיט ניגוני שירה,
נאך חצות הלילה האט זיך דער רב אויפגעשטעלט און געטאנצן די 'פסוקי שירת הים' מיט א פלאם פייער ורגש דקדושה פאר א לענגערע צייט אינאיינעם מיט'ן גאנצן פארזאמלטן ציבור,
מיט אז ביום השביעי האט דער רב מכבד געווען הרה"ג ר' מאיר צוויבל שליט"א - מרבני קהילתינו הק',
דערנאך איז דער ציבור אריבער וואונטשן א גוט שבת און א גוט יום טוב,
מען האט געענדיגט ארום 1:30, און דער רב האט פארלאזט דעם בנין הביהמ"ד אויפ'ן וועג אהיים לביתו.